محنت اور یک جہتی کے ساتھ ہمیں ملک کو ایک مضبوط اور ترقی یافتہ قوم کے طور پر دنیا کے سامنے لانا ہے، وفاقی وزیر
اسلام آباد:
وفاقی وزیر منصوبہ بندی اور ترقی احسن اقبال نے نوجوانوں کی شہری ذمہ داریوں کی ادائیگی کو پاکستان کے استحکام کی ضمانت قرار دیتے ہوئے کہا ہے کہ معرکہ حق کے بعد اب ہمیں ترقی کا معرکہ سر کرنا ہے۔
اسلام آباد میں اسلامک ریسرچ انسٹیٹیوٹ میں ‘ابھرتے ہوئے پاکستان میں نوجوانوں کا کردار بطور عالمی رہنما’ کے موضوع پر سیمینار کا انعقاد کیا گیا، جس کا آغاز پاکستان کے 79 ویں یوم آزادی کی مناسبت سے پرچم کشائی اور کیک کاٹنے کی پروقار تقریب سے کیا گیا۔
تقریب میں وفاقی وزیر منصوبہ بندی اور ترقی احسن اقبال اور وزیر مملکت برائے تعلیم اور پیشہ ورانہ تربیت وجیہہ قمر نے شرکت کی۔
احسن اقبال نے تقریب سے خطاب میں کہا کہ معرکہ حق کے بعد اب ہمیں ترقی کا معرکہ سر کرنا ہے۔
انہوں نے کہا کہ پاکستان کا مستقبل روشن ہے اور اگلے 22 برس انتہائی اہم ہیں، جن میں محنت اور یک جہتی کے ساتھ ہمیں ملک کو ایک مضبوط اور ترقی یافتہ قوم کے طور پر دنیا کے سامنے لانا ہے۔
وفاقی وزیر نے زور دیا کہ پائیدار ترقی اور خوش حالی امن کے بغیر ممکن نہیں، قومی یک جہتی فرقہ واریت اور پولرائزیشن کے خاتمے اور نوجوانوں کی شہری ذمہ داریوں کی ادائیگی ہی پاکستان کے استحکام کی ضمانت ہے۔
وزیرِ مملکت وجیہہ قمر اور دیگر مقررین نے کہا کہ تعلیم قومی ترقی اور خوش حالی کی بنیاد ہے۔
انہوں نے کہا کہ نوجوان نسل نے معرکہ حق میں نظریاتی سرحدوں کی حفاظت کے ساتھ ساتھ سوشل میڈیا پر افواج پاکستان کی بھرپور حوصلہ افزائی کر کے قومی اتحاد کی مثال قائم کی ہے۔
مقررین نے مزید کہا کہ نوجوان پاکستان کے سب سے بڑا اثاثہ ہیں، جن کے کردار اور ذمہ داریوں سے نہ صرف پولرائزیشن کا خاتمہ ممکن ہے اور ایک پرامن، یکجا اور عالمی سطح پر ابھرتا ہوا پاکستان تشکیل دیا جا سکتا ہے۔
About the Author
