انہوں نے کہا کہ نئے کھلاڑیوں پر اعتماد کر کے ہی ٹیم کو مستقبل کے لیے مضبوط بنایا جا سکتا ہے
لاہور:
شاہین آفریدی نے ٹیم میں اختلافات کی افواہوں کو مسترد کر دیا، ان کے مطابق بابر اور رضوان ملکی کرکٹ کا اثاثہ ہیں لیکن نوجوانوں کو بھی سپورٹ کرنا چاہیے۔
پی سی بی کی جانب سے جاری کردہ ویڈیو انٹرویو میں شاہین آفریدی نے ٹیم میں اختلافات کے حوالے سے پھیلائی جانے والی افواہوں کو بے بنیاد قرار دیتے ہوئے کہا کہ باہر سے لوگ باتیں ضرور کرتے ہیں مگر حقیقت برعکس ہے، جیسے کسی خاندان میں معمولی باتیں ہو جاتی ہیں ویسے ہی ٹیم میں بھی ہو سکتی ہیں ،البتہ ہم سب کا اصل مقصد پاکستان کے لیے کرکٹ کھیلنا اور ہم وطنوں کو خوشی دینا ہے، باقی معاملات ذاتی آراء ہیں ان کا احترام ہونا چاہیے۔
انھوں نے مزید کہا کہ بابر اعظم اور محمد رضوان پاکستان کرکٹ کا اثاثہ ہیں تاہم نئے کھلاڑیوں پر اعتماد کر کے ہی ٹیم کو مستقبل کے لیے مضبوط بنایا جا سکتا ہے،اگر ہم نوجوانوں پر تنقید کے بجائے اعتماد ظاہر کریں تو یہ ہمارے لیے فائدہ مند ہوگا،یہ بھی پاکستان کے کھلاڑی ہیں اور انھیں آگے لے کر جانا ہماری اجتماعی ذمہ داری ہے۔
انھوں نے کہا کہ ٹرائنگولر سیریز ایشیا کپ سے قبل قومی ٹیم کو بہترین تیاری کا موقع فراہم کرے گی، کیمپ میں دوسرے دن کی تیاری اطمینان بخش رہی، جمعرات کی شب کھلاڑیوں نے بھرپور پریکٹس کی جبکہ جمعے کو دبئی اسٹیڈیم میں سیشن اور وارم اپ میچ ہوا، جس سے کھلاڑیوں کے اعتماد اور فٹنس دونوں میں بہتری آگئی، یہ تیاریاں ٹرائنگولر سیریز اور ایشیا کپ میں ٹیم کے لیے مفید ثابت ہوں گی۔
ایک سوال پر شاہین آفریدی نے کہا کہ ٹی ٹوئنٹی کرکٹ کسی بھی ٹیم کے لیے آسان نہیں ہوتی تاہم پاکستان کے پاس موجود نوجوان کھلاڑی پوری طرح تیار اور بہترین کارکردگی دکھانے کے لیے پْرعزم ہیں،پلیئرز کو اس بار دبئی اسٹیڈیم میں تیاریوں کا زیادہ وقت مل رہا ہے جس سے کھیل میں نکھار آنے کے ساتھ بڑے مقابلوں کیلیے ٹیم کا حوصلہ بھی بلند ہوگا۔
انھوں نے کہا کہ فی الحال ہمارا پہلا ہدف ٹرائنگولر سیریز ہے جس کے بعد توجہ ایشیا کپ پر مرکوز کی جائے گی۔
About the Author
