جہلم (رپورٹ: ملک حسان قذافی سرعام نیوز) وفاقی وزیر مملکت برائے خزانہ و ریلوے بلال اظہر کیانی کے حکم پر ضلعی انتظامیہ جہلم نے ریلوے کی زمین پر قائم غیر قانونی سبزی منڈی اور تجاوزات کے خلاف فیصلہ کن کارروائی کرتے ہوئے قابض مافیا کی دکانیں مسمار کر دیں۔ یہ اہم کارروائی گروپ ایڈیٹر سر عام نیوز و صدر پریس کلب ڈاکٹر سہیل امتیاز خان اور دیگر سینئر صحافی برادری کی جانب سے پریس کانفرنس کے دوران کی گئی نشاندہی پر عمل میں لائی گئی۔پریس کانفرنس کے دوران صدر پریس کلب ڈاکٹر سہیل امتیاز خان اور دیگر صحافی برادری نے وفاقی وزیر کو آگاہ کیا کہ ریلوے کی زمین پر غیر قانونی قبضے اور سبزی منڈی کی وجہ سے علاقہ مکین شدید اذیت کا شکار ہیں۔ انہوں نے نشاندہی کی کہ تجاوزات کی وجہ سے پیدا ہونے والے بے ہنگم رش، گندگی کے ڈھیروں اور تعفن کے باعث راہگیروں کا گزرنا محال ہو چکا تھا، جبکہ سکول جانے والے بچے وقت پر اپنی منزل تک نہیں پہنچ پاتے تھے۔ اس موقع پر چیف ایڈیٹر روزنامہ سر عام نیوز ملک حسان قذافی، کفیل بیگ کیفی، ارباز بٹ، سابق چیئرمین بلدیہ مرزا راشد، منیز احمد تارڑ اور دیگر سیاسی و سماجی شخصیات بھی موجود تھیں۔وفاقی وزیر بلال اظہر کیانی نے صحافی برادری کی جانب سے عوامی مسائل کی نشاندہی کا فوری نوٹس لیتے ہوئے ڈپٹی کمشنر جہلم کو جائے وقوعہ پر جا کر سخت کارروائی کرنے کا حکم دیا۔ جس پر ضلعی انتظامیہ نے بھاری مشنری کے ہمراہ موقع پر پہنچ کر غیر قانونی دکانیں مسمار کر دیں اور ریلوے کی قیمتی اراضی کو واگزار کروا لیا۔
About the Author
