جہلم کی تحصیل دینہ اور سوہاوہ میں فیڈرل بورڈ آف ریونیو (FBR) اور محکمہ ایکسائز، ٹیکسیشن اینڈ نارکوٹکس کنٹرول نے سمگل شدہ اور نان کسٹم پیڈ سگریٹس کے خلاف مشترکہ کارروائی کرتے ہوئے لاکھوں روپے مالیت کا مال ضبط کر لیا ہے۔ یہ کارروائی ڈائریکٹر ایکسائز ٹیکسیشن اینڈ نارکوٹکس کنٹرول ڈیپارٹمنٹ راولپنڈی، محمد عمران اسلم، کی خصوصی ہدایت پر کی گئی۔
ایکسائز اینڈ ٹیکسیشن آفیسر (ETO) جہلم، منور حسین، کی زیرِ نگرانی انسپکٹر اسد بارون اور ان کی ٹیم نے FBR کے اہلکاروں کے ہمراہ دینہ اور سوہاوہ کے علاقوں میں واقع پیٹرول پمپس کی ٹاک شاپس اور ہول سیل ڈیلرز کے ٹھکانوں پر چھاپے مارے۔ اس دوران حکام نے سینکڑوں پیکٹس سگریٹ قبضے میں لیے جن کی مجموعی مالیت لاکھوں روپے بنتی ہے۔
حکومتِ پنجاب کی جانب سے سمگل شدہ سگریٹس کے کاروبار میں ملوث افراد کے خلاف سخت کارروائی جاری ہے کیونکہ ان سرگرمیوں سے قومی خزانے کو اربوں روپے کا نقصان ہو رہا ہے۔ انسپکٹر اسد بارون نے اس عزم کا اعادہ کیا ہے کہ یہ انسدادی کارروائیاں بلا امتیاز جاری رہیں گی اور اس غیر قانونی کاروبار میں ملوث کسی بھی شخص کے ساتھ کوئی نرمی نہیں برتی جائے گی۔ ضبط شدہ مال کے خلاف قانونی کارروائی عمل میں لائی جا رہی ہے۔
About the Author
