آزادکشمیر میں ایکشن کمیٹی کے احتجاج کا معاملہ

(‏علی چوھدری اسلام آباد)
آزاد کشمیر ایکشن کمیٹی نے پہلے 12 اور بعد میں 50 مطالبات پیش کیے۔ وفاقی حکومت اور آزاد کشمیر حکومت پر مشتمل کمیٹی نے، جس میں وفاقی وزیر برائے امورِ کشمیر انجینئر امیر مقام اور وفاقی وزیر پارلیمانی امور ڈاکٹر طارق فضل چوہدری نے وفاق کی نمائندگی کی، مہاجرین کی 12 سیٹوں اور تنخواہوں اور حکومتی مراعات یعنی صرف 2 مطالبات کے سوا باقی 50 میں سے 48 مطالبات مان لیے۔ یہ دراصل ایکشن کمیٹی کی 99 فیصد کامیابی تھی۔

اس کے باوجود وہ دو مطالبے جو قانون سازی کے متقاضی تھے، اُن کو بہانہ بنا کر بات نہ ماننا اور پُرامن خطے کو دانستہ افراتفری کی نظر کرنا کشمیری عوام کے مفاد کا ایجنڈا نہیں بلکہ پسِ منظر میں کچھ اور عزائم ہیں۔ ورنہ 99 فیصد مطالبات کو مان لیا جانا مذاکرات کی دنیا کا ایک ریکارڈ ہے۔

جذباتی اور حقائق سے ناواقف لوگوں کو اس پر سنجیدہ غور کرنے کی سخت ضرورت ہے، بصورتِ دیگر سوائے پچھتاوے کے کچھ ہاتھ نہیں آئے گا۔

‏آزاد کشمیر ایکشن کمیٹی اپنی مرضی سے فیصلہ کرنا چاہتی ہے کہ کون کشمیری ہے اور کون نہیں وہ اب مہاجرین کو کشمیری نہیں مانتے ، حالانکہ خود ایکشن کمیٹی والون کو پتہ ہے کہ کشمیری بھائیوں کے گھر، کاروبار اور روزگار پنجاب، سندھ، خیبر پختونخوا، بلوچستان اور اسلام آباد میں بھی ہیں۔

پاکستان نے اپنے ان کشمیری بھائیوں کو جگہ دی، زمین دی، گھر دیے، لیکن آج یہ چند گمراہ لوگ دشمن سے چند سکوں کے عوض کشمیر کے مالک بننے کے دعوے دار ہیں۔

آزاد کشمیر ایکشن کمیٹی کا احتجاج صرف اور صرف بھارت کو خوش کرنے کے لیے ہے۔ وزیرِ اعظم پاکستان میاں شہباز شریف اقوامِ متحدہ کے اعلیٰ فورم پر کشمیری عوام کا مقدمہ لڑ رہے ہیں، مگر افسوس کہ دوسری جانب ایکشن کمیٹی ایسا بیانیہ ہوا دے رہی ہے جو کشمیری قوم کی اصل آواز نہیں ہو سکتا۔ یہ تضاد نہ صرف جدوجہدِ کشمیر کو کمزور کرتا ہے بلکہ دشمن کو فائدہ پہنچانے کے مترادف ہے۔

وفاقی حکومت نے عوامی حقوق سے متعلق تمام مطالبات تسلیم کیے ہیں۔ اگر یہ مودی اور بھارت کو خوش کرنے کے لیے احتجاج کرنا چاہتے ہیں تو کریں، لیکن اس احتجاج کا مقصد صرف انتشار ہے۔ محبِ وطن کشمیری ان کے عزائم کو ناکام بنائیں گے۔ کشمیری عوام کا ایک ہی نعرہ ہے: ہم پاکستانی ہیں، پاکستان ہمارا ہے۔