کالم: صاف ستھرا پنجاب ہمارا فرض، ہماری ذمہ داری

تحریر وترتیب ✍️ محمد زاہد مجید انور
صاف اور خوبصورت ماحول کسی بھی مہذب معاشرے کی پہچان ہوتا ہے۔ جہاں گلیاں، بازار، سڑکیں اور پارک صاف ہوں، وہاں نہ صرف خوبصورتی بڑھتی ہے بلکہ عوام کی صحت اور زندگی کا معیار بھی بہتر ہوتا ہے۔ وزیراعلیٰ پنجاب محترمہ مریم نواز شریف کے ویژن "ستھرا پنجاب، صحت مند پنجاب” کے تحت صوبے بھر میں صفائی ستھرائی کے انقلابی اقدامات جاری ہیں، جن میں ٹوبہ ٹیک سنگھ نمایاں طور پر آگے بڑھ رہا ہے۔ڈپٹی کمشنر عمر عباس میلہ کی زیرِ نگرانی اور ڈائریکٹر ویسٹ مینجمنٹ کمپنی میڈی لینڈ وسیم اسداللہ کی قیادت میں 70 سال سے نظر انداز شدہ قبرستان روڈ (ڈی پی ایس اسکول کے ساتھ) کی مکمل صفائی ستھرائی کر کے ایک قابلِ تقلید مثال قائم کی گئی ہے۔ یہ علاقہ ماضی میں گندگی، بدبو اور ماحولیاتی آلودگی کا گڑھ سمجھا جاتا تھا، مگر اب وہاں صفائی کا نیا دور شروع ہو چکا ہے۔یہ کام صرف صفائی نہیں بلکہ ایک طرزِ فکر کی تبدیلی ہے — کہ ہم اپنے شہر کو کیسے دیکھنا چاہتے ہیں؟ صاف اور منظم، یا گندگی میں ڈوبا ہوا؟وسیم اسداللہ اور ان کی ٹیم دن رات محنت کر رہی ہے، فیلڈ میں مانیٹرنگ اسٹاف اور عملہ صفائی متحرک ہے تاکہ کوئی گوشہ ایسا نہ رہے جہاں صفائی کی کمی محسوس ہو۔ لیکن یہ حقیقت بھی نظرانداز نہیں کی جا سکتی کہ صفائی محض سرکاری اداروں کی ذمہ داری نہیں، بلکہ ہر شہری کا اخلاقی، دینی اور سماجی فرض بھی ہے۔ہمارے دینِ اسلام میں صفائی کو نصف ایمان قرار دیا گیا ہے۔ اگر ہر شہری یہ سوچ لے کہ اسے اپنے محلے، گلی اور بازار کو صاف رکھنا ہے تو یقیناً کسی حکومت کو علیحدہ سے صفائی مہم نہیں چلانی پڑے گی۔ڈائریکٹر ویسٹ مینجمنٹ کی شہریوں سے اپیل بالکل بجا ہے کہ وہ انتظامیہ کے ساتھ تعاون کریں، کیونکہ مستقل صفائی کے نظام کا قیام عوامی شمولیت کے بغیر ممکن نہیں۔صاف ستھرا ماحول نہ صرف بیماریوں کے خاتمے کا سبب بنتا ہے بلکہ سماجی ہم آہنگی، خوش اخلاقی اور بہتر طرزِ زندگی کی بنیاد بھی رکھتا ہے۔اب وقت آ گیا ہے کہ ہم شکایت کے بجائے عمل کی راہ اختیار کریں، کوڑا سڑکوں پر پھینکنے کے بجائے کوڑا دان میں ڈالیں، صفائی کرنے والے عملے کی عزت کریں، اور اپنے شہر کو واقعی “ستھرا ٹوبہ ٹیک سنگھ” بنانے میں کردار ادا کریں۔آخر میں یہی کہنا چاہوں گا کہ "صاف شہر صرف حکومت کی محنت سے نہیں، شہریوں کے شعور سے بنتے ہیں۔اگر ہم سب نے اپنا حصہ ڈال دیا تو یقیناً ٹوبہ ٹیک سنگھ وہ شہر بن سکتا ہے جس پر ہم فخر کر سکیں ایک صاف، خوبصورت اور صحت مند شہر۔