وفاقی وزیر داخلہ سید محسن رضا نقوی کی ہدایت پر چیئرمین سی ڈی اے و چیف کمشنر اسلام آباد محمد علی رندھاوا نے ڈی سی اسلام آباد عرفان نواز میمن کے ہمراہ اسلام آباد میں شدید بارش کے بعد کلئیرنس آپریشن کی ذاتی نگرانی کی

(علی چوھدری اسلام آباد)

تفصیلات کے مطابق اسلام آباد میں ایچ ایٹ میں 99 ملی میٹر، گولڑہ میں 78 ملی میٹر، سید پور میں 46 ملی میٹر اور مجموعی طور پر 70 ملی میٹر بارشں ریکارڈ کی گئی۔ چیئرمین سی ڈی اے کی ہدایت پر بروقت اقدامات اٹھاتے ہوئے بارش کے فوراً بعد تمام نشیبی علاقوں، انڈپاسز اور مرکزی شاہراہوں کو کلیئر کر دیا گیا۔ واضح رہے ڈپلومیٹک انکلیو اور سید پور ویلج کا ایریا مکمل طور پر پانی سے کلیئر ہوچکا ہے جبکہ سیکٹر G-11 کو رات کو ہی 70 فیصد پانی سے کلیئر کر دیا گیا تھا۔

چیئرمین سی ڈی اے و چیف کمشنر اسلام آباد سی ڈی اے ضلعی انتظامیہ کی مشترکہ ٹیموں کے ہمراہ فلیڈ میں خود بھی موجود رہے۔ انہوں نے کہا کہ اسلام آباد کی تمام شاہراہوں پر ٹریفک معمول کے مطابق رواں دواں ہے۔ انہوں نے کہا کہ سی ڈی اے، ایمرجنسی اینڈ ڈیزاسٹر مینجمنٹ، ایم سی آئی اور ضلعی انتظامیہ کی مشترکہ ٹیمیں فیلڈ میں اپنی موجودگی کو یقینی بنائیں اور ہدایت کی کہ فیلڈ ٹیمیں شہریوں کو ہر ممکن سہولت و مدد فراہم کریں۔

چیئرمین سی ڈی اے کی ہدایت پر نالوں میں پانی کے بہاؤ کی نگرانی کیلئے سی ڈی اے کا عملہ اور مشینری فیلڈ میں تعینات رہے تاکہ کسی بھی ہنگامی صورتحال سے بروقت نمٹا جاسکے۔ چیئرمین سی ڈی اے نے ہدایت کی کہ اسلام آباد انتظامیہ اور سی ڈی اے کے افسران فیلڈ میں موجود رہ کر سخت مانیٹرنگ کے نظام کو یقینی بنائیں۔

چیئرمین سی ڈی اے نے کہا کہ اسلام آباد کی مرکزی شاہراہوں، نالوں اور آبی گزرگاہوں کی سخت نگرانی کو ہر صورت یقینی بنایا جائے تاکہ شہریوں کو کسی بھی قسم کی پریشانی کا سامنا نہ کرنا پڑے۔ چیئرمین سی ڈی اے کی ہدایت پر انڈر پاسسز اور نشیبی علاقوں پر نکاسی آب کو یقینی بنایا جارہا ہے۔ انہوں نے کہا کہ سڑکوں اور نالوں میں پانی کے بہاؤ میں رکاوٹوں کو دور کرکے پانی کی نکاسی کو فوری یقینی بنایا جارہا ھے۔

مون سون بارشوں کے دوران کسی بھی ہنگامی صورتحال کے پیش نظر شہری سی ڈی اے اور ضلعی انتظامیہ کے ایمرجنسی نمبر 16 اور 1334 پر رابطہ کرسکتے ہیں۔ چیئرمین سی ڈی اے نے کہا کہ موصول ہونے والی تمام شکایات کا بروقت ازالہ ہر حال میں ممکن بنایا جائے۔

اس موقع پر سی ڈی اے انتظامیہ نے بھی شہریوں سے تعاون کی اپیل کرتے ہوئے کہا کہ شہری غیر ضروری سفر سے گریز کریں اور احتیاطی تدابیر کے ساتھ حکام کی ہدایات پر عمل کریں تاکہ کسی بھی قسم کی پریشانی سے بچا جاسکے۔