چین، ایران کی ضمانت اور قطر کی نگرانی میں پاکستان-افغانستان جامع امن معاہدہ طے، 2 سال کے لیے قابلِ عمل

(بیورو چیف سرعام نیوز طاہر محمود ٹیکسیلا)

پاکستان اور افغانستان نے ایک جامع امن معاہدے پر اتفاق کیا ہے، جس کا مقصد دونوں برادر اسلامی ممالک کے درمیان سرحدی امن، دہشت گردی کے خلاف تعاون، اور تجارتی و انسانی روابط کو مضبوط بنانا ہے۔ یہ معاہدہ ابتدائی طور پر دو سال کے لیے قابل عمل ہوگا اور بعد میں دونوں ممالک کی باہمی رضامندی سے توسیع بھی کی جاسکتی ہے۔

معاہدے میں چین اور ایران ضامن ممالک کے طور پر شامل ہیں، جبکہ ریاستِ قطر اس کی نگرانی کرے گی اور ہر تین ماہ بعد جائزہ اجلاس منعقد ہوگا، جس میں فریقین معاہدے پر عمل درآمد کا جائزہ لیں گے۔

معاہدے کے اہم نکات:

سرحدی امن و استحکام: چمن، ٹورخم اور غلام خان سرحدی علاقوں میں ہر قسم کی فائرنگ اورt اشتعال انگیزی فوری طور پر بند کی جائے گی۔ دونوں ممالک کے فوجی افسران کے لیے ایک مشترکہ سرحدی رابطہ مرکز قائم کیا جائے گا۔

دہشت گردی کے خلاف تعاون: افغانستان اس بات کی یقین دہانی کرائے گا کہ اس کی سرزمین کسی بھی گروہ کے لیے استعمال نہیں ہوگی جو پاکستان کے خلاف کارروائیاں کرے۔ اس کے بدلے میں پاکستان افغان مہاجرین کے ساتھ انسانی اور اسلامی اصولوں کے مطابق تعاون جاری رکھے گا۔ دونوں ممالک تحریک طالبان پاکستان (TTP) اور دیگر غیر ریاستی گروہوں کے خلاف معلومات کے تبادلے اور ممکنہ کارروائی پر بھی اتفاق کریں گے۔

تجارتی و انسانی رابطے: چمن اور ٹورخم سرحدوں پر تجارت کے لیے علیحدہ "امن کاریڈور” قائم کیا جائے گا۔ عام شہریوں، تاجروں اور مریضوں کے لیے خصوصی پاس نظام بنایا جائے گا تاکہ آمد و رفت محفوظ اور آسان ہو۔

میڈیا اور سفارتی آداب: دونوں ممالک کے سرکاری ترجمان اور میڈیا ادارے ایک دوسرے کے خلاف اشتعال انگیز بیانات دینے سے گریز کریں گے اور باہمی احترام و اسلامی اخوت کے اصولوں پر مبنی بیانات کو ترجیح دیں گے۔

نگرانی و ضمانت: ریاستِ قطر معاہدے کی میزبانی اور نگرانی کرے گی جبکہ چین اور ایران ضامن ممالک کے طور پر اس کی حمایت کریں گے۔

پاکستان اور افغانستان کے حکام نے امید ظاہر کی ہے کہ یہ معاہدہ خطے میں امن، استحکام اور بھائی چارے کی مضبوط بنیاد رکھے گا۔

اللّٰہ کریں دونوں ممالک اپنے وعدوں پر قائم رہیں اور خطہ امن و آشتی کا گہوارہ بنے۔ آمین۔