جموں کشمیر جوائنٹ عوامی ایکشن کمیٹی کی مذاکرات سے قبل حکومت کے سامنے سخت شرائط، فوری عمل درآمد کا مطالبہ

( رپورٹ علی چوہدری اسلام آباد )
مظفرآباد میں موجود ذرائع کے مطابق جموں کشمیر جوائنٹ عوامی ایکشن کمیٹی (JAAC) نے حکومت کی طرف سے مذاکرات کی پیشکش کا خیرمقدم کرتے ہوئے، بات چیت شروع کرنے سے پہلے فوری طور پر عمل درآمد کے لیے پانچ اہم شرائط عائد کر دی ہیں۔ کمیٹی کا مؤقف ہے کہ ان مطالبات پر عمل درآمد کے بعد ہی مذاکرات کا عمل شروع کیا جا سکتا ہے۔

کمیٹی نے اپنے جاری کردہ اعلامیے میں واضح کیا ہے کہ عوامی حقوق کی جدوجہد میں کسی قسم کی لچک نہیں دکھائی جائے گی اور ان شرائط کو پورا کرنا عوامی امنگوں کا ترجمان ہے۔

کمیٹی کے اہم مطالبات اور شرائط
جوائنٹ عوامی ایکشن کمیٹی کی طرف سے حکومت کو بھیجی گئی شرائط مندرجہ ذیل ہیں:
1. سانحہ مظفرآباد اور دہشت گردی کے خلاف کارروائی:
سانحہ مظفرآباد میں شہری کو شہید کرنے والی جماعت کے اعلان کردہ دہشت گرد گروہ کو فوری طور پر دہشت گرد تنظیم قرار دیا جائے۔

مظفرآباد میں درج ایف آئی آر میں انسداد دہشت گردی ایکٹ (ATA) کی دفعات 6/59 کو شامل کیا جائے۔

2. شہداء اور زخمیوں کے لیے یکساں معاوضہ:
شہید شہری، شہید پولیس اہلکار اور زخمیوں کے خاندانوں کے لیے حکومت کی جانب سے فوری طور پر امدادی رقم کی ادائیگی کا نوٹیفکیشن جاری کیا جائے۔

یہ معاوضہ شہید پولیس کے 2 اہلکاروں کو دی جانے والی امداد کے برابر ہونا چاہیے۔

3. سانحہ راولاکوٹ دہشت گردی کیس میں ایف آئی آر:
29 ستمبر کے سانحہ راولاکوٹ میں ملوث دہشت گردوں کے ویڈیو ثبوت کی بنیاد پر ان کے خلاف فوری طور پر ایف آئی آر درج کی جائے۔

4. 8 دسمبر کے معاہدے پر عمل درآمد اور مقدمات کا خاتمہ:
8 دسمبر کے معاہدے کے تحت تمام چیزوں پر نوٹیفکیشن جاری کیے جائیں۔
*

9 مئی 2023ء تک کے تمام مقدمات کے خاتمے کا نوٹیفکیشن جاری کیا جائے۔

انڈسٹریل و تجارتی معاملات میں تمام ٹیکسز کے خاتمے کا نوٹیفکیشن بھی جاری کیا جائے۔

5. تمام گرفتار شدگان کی فوری رہائی:
جموں کشمیر جوائنٹ عوامی ایکشن کمیٹی کے ممبر ایڈووکیٹ راجہ احمد علی خان سمیت کشمیر اور پاکستان بھر میں گرفتار تمام افراد کو مذاکرات سے قبل فوری طور پر رہا کیا جائے۔